أسهل طريقة مجربة لعمل ذكر شرقي أصيل من البيت

 أسهل طريقة مجربة لعمل ذكر شرقي أصيل من البيت

النهاردة جايبالكم أسهل وأسرع وصفة نعمل بيها ذكر شرقي أصيل في عشر خطوات بس، والنتيجة ولا أروع! ورقةوقلم واكتبي ورايا يا ست الكل:

1. نخلف ولد ونتباهى بيه، كأنه اكتشاف لمجرة جديدة مثلًا، ونفرح فرحة مصر في نهائي كأس العالم لما حد ينادينا "أبو فلان" أو "أم فلان".

2. الصغنن كبر؟ يلا بينا ننفذ كل طلباته، دي أوامر علينا حتى لو هنبيع كليتنا علشان نفسه يجرب "حتة من السما". إحنا عندنا كام صغنن أصلاً؟

3. حبيب ماما وستو وجدو كبر؟ يلا نبدأ الامتيازات: كتير تأخير براحتك، قروض البنوك كلها تحت أمرك، اضرب إخواتك البنات علشان نسوا يكوا الشراب، عادي جدًا، انت ذكر براحتك!

4. كازانوفا الكوكب كبر جواه؟ يلا بينا يا بنات تحت رجله! يصاحب خمسة، يتسلى بسبعة، يدشمل 15! إيه يعني، بلاش الواد يعيش سنه ويفرح؟ فين العدالة؟

5. حبيب ماما جرب وعاش حياته... شرب كل اللي بيتشرب، فشل في دراسته، دشمل قلوب نص بنات الكوكب، وطلع عيننا كلنا. طيب يلا ندور على عروسة فول أوبشن، بتطير وتسهر على راحته. وشرط يكون فارس أحلامها الأول، أصلاً قلب ماما بيغير ويقفش، يعني إيه كان في ذكر في حياتها قبله؟!

6. حبيب ستو وجدو خطب؟ على ذوق مامته طبعًا، لأنها أحسن واحدة بتعمل بشاميل، ومستحيل يرفض ليها طلب. إيه يعني فرشت البيت كله على ذوقها، ونقت حتى هدوم العروسة؟ قلب ماما ما يقدرش يزعلها، وعمرك ما هتفهمي أكتر من مامته.

7. خيرة شباب الكوكب اتجوز! مش فاهمة إيه مشكلتك إنه مش بيشيل أي مسؤولية وكل حاجة عليكي؟ وإيه يعني تصرفي على البيت كمان؟ مش كفاية عليكي شرف عصمته الكريمة؟ متبقيش طماعة بقى!

8. قلب ماما زهق من الروتين وخنقة البيت... طلباته دايمًا مجابة، مش ناقصه حاجة. إيه يعني حب يجدد ويعرف عليكي اتنين تلاتة؟ احمدي ربنا إنه لسه مستحملك، اسكتي وارضي أحسن ذكرنا يضايق ويتعصب، منقدرش على زعل حبيبنا كلنا.

9. ذكرنا اتعصب؟ علشان نسيتي تكوي فردة الشراب زي إخواته، ضربك علقة موت، أدت لعاهات مستديمة؟ انتي الغلطانة، إزاي تغلطي الغلطة دي؟!

10. حبيب ماما زهق، طلقك ورماكي في الشارع، بهدلك في المحاكم علشان مش عايز يصرف على عيالك. هو حر على فكرة! انتي اللي وصلتيه لكده وزعلتيه. إحنا تعبنا أوي في كل المراحل دي علشان نوصله للجمال ده. انتي الغلطانة معرفتيش تحافظي على آخر نسخة من جيله.

الخلاصة:

إنك تعملي ذكر شرقي سهل جدًا، ومش لازم تنفذي كل الخطوات. خطوتين تلاتة هيطلعوا أحلى نتيجة، بس بطعم مختلف! وكل ما نفذنا خطوات أكتر، كل ما النتيجة هتبهرك وتبهرنا كلنا. أنا مبهورة بنفسي بصراحة! ياريت بس نركز إننا بنعمل "ذكر" مش "راجل"، لأن الفرق بينهم زي الفرق بين الجاتوه وخشب البامبو.

أما لو نيتك كانت تعملي راجل بجد، دي بقى محتاجة وصفة تانية خالص، هنقولها في المقال الجاي.

وبالهنا والشفا!