لقاء مع الكاتبة/ أسماء ندا
الكتابة دايمًا بتكون باب مفتوح على عوالم مختلفة، والنهارده معانا الكاتبة أسماء ندا، اللي هتحكي لنا عن تجربتها في الكتابة، أهدافها، وطموحاتها.
---
1. عرفينا بنفسك وبداية مشوارك في الكتابة.
أنا أسماء ندا، بدايتي مع الكتابة كانت من شغفي بالكلمات. كنت بحب أكتب أفكار بسيطة وبمرور الوقت اتحولت لقصص وروايات. الكتابة بالنسبة لي مش مجرد هواية، دي وسيلة أعبر بيها عن نفسي وأفكاري.
2. إيه العمل الأدبي اللي بتحسّي إنه كان له أكبر تأثير في مسيرتك؟
فيه عمل معين أثر فيّ جدًا وكان نقطة تحول في حياتي الأدبية، خلاني أطور أسلوبي وأشوف الكتابة بشكل أعمق.
3. إيه الجديد في عملك الأخير؟ وكلمينا عن أهم ما يميز الكتاب ده.
عملي الأخير هو رواية "جزيرة الهلاك"، عمل مختلف بيقدم تجربة جديدة في عالم الرعب، بيمزج بين الواقع والخيال بشكل مش تقليدي. اللي بيميز الكتاب هو التركيز على الجانب النفسي والتشويق بعيدًا عن الرعب التقليدي.
4. لو في اقتباس واحد يعبر عن فكرة كتابك الأخير، هيكون إيه؟
"بين طيات الظلام الدامس، وسكون الليل، احذر الهمس. اثبت لا تتحرك، كن كالتماثيل المتناثرة في أرجاء الجزيرة. امتنع عن التنفس إن استطعت، فإن لم تستطع فاعلم أنك مجرد مقبلات داخل صحن طعام كبير، صنع خاصًا لي. إنك في جزيرتي، مملكتي. استمتع نهارًا كما شئت، بين سحرها الخلاب، لكن نصيحة: لا تتعمق داخلها حتى لا يتم التهامك."
5. إيه الرسالة أو الهدف اللي حاولتِ توصيله من خلال كتابك؟
الرسالة كانت إن الإنسان لازم يعتمد على نفسه علشان يقوم من أي سقوط، وماينتظرش مساعدة من حد. وكمان حاولت أقدم شكل جديد للرعب بعيد عن الجن والأشباح، وأركز على الرعب النفسي.
6. إزاي كانت تجربتك مع الكتابة والنشر بشكل عام؟
تجربة شيقة جدًا، بس أكتر حاجة فيها إن الهدف الأساسي يكون تكوين جمهور، مش المكسب المادي، لأنه غالبًا بيكون محدود.
7. إيه أكتر حاجة بتحبيها في تفاعل القراء مع كتاباتك؟
بحب النقاشات اللي بتحصل مع القراء، لأنها بتفتح لي زوايا جديدة وأفكار مختلفة.
8. إيه النصيحة اللي تشوفيها مفيدة لأي كاتب مبتدئ؟
مايزعلش من النقد، بالعكس، يستغله علشان يطور من نفسه ويصحح أفكاره.
9. إيه طموحاتك الأدبية المستقبلية؟
أتمنى أكتب في أنواع أدبية مختلفة بعيدًا عن الفانتازيا والدراما، وأجرب ألوان جديدة في الكتابة.
10. إيه الحاجة اللي بتشجعك وتدفعك للاستمرار في الكتابة؟
تفاعل القراء مع كتاباتي هو أكتر حاجة بتخليني أكمل وأطور من نفسي.
---
ختامًا،
الكتابة عند أسماء ندا مش مجرد كلمات، لكنها رسالة وشغف. بنشكرها على وقتها وعلى مشاركتها لتجربتها، ونتمنى لها كل التوفيق في أعمالها القادمة. تابعونا علشان نعرف أكتر عن عالم الكتابة والإبداع.
تعليقات
إرسال تعليق
يسعدنا مشاركة رأيك