لقاء مع الكاتبة/ إيمان صالح

لقاء مع الكاتبة إيمان صالح

1. عرفينا بنفسك وبمسيرتك في الكتابة؟ 

-إيمان صالح، كاتبة مصرية، ٣٨ سنة، حاصلة على ليسانس تربية من محافظة الدقهلية. بدأت الكتابة عام ٢٠٢٠ بعملها الأول "بنوفيلا لعنة المنبوذة ذكر"، وبعدها توالت الأعمال.

2. إيه أهم أعمالك الأدبية اللي بتفخري بيها؟

-"قطر المنصورة"، "مقام سيدي الأحمر"، "عوالم نابليون"، "جدايل حكيمة القبائل". كل عمل حطيت فيه جزء من روحي، ولازم أفتخر بيه.

3. كلمينا عن عملك الأخير.. إيه فكرته، وإيه اللي بيميزه عن باقي أعمالك؟

-عملي الأخير كان محاولة لتلخيص الخلود من منظوري. الخلود بيتلخص في عمل الإنسان، سواء كان خير أو شر، وسواء كان الإنسان ضعيف أو قوي. الفكرة ببساطة إن اللي بيبقى بعد موتنا هو سيرتنا بالخير أو الشر، مواقفنا بالضعف أو بالقوة.

4. لو تختاري اقتباس واحد يعبر عن روح عملك الأخير، هيكون إيه؟

-"أبطال الخير باقون، أبطال الشر زائلون."

5. إيه الرسالة أو الفكرة الأساسية اللي حاولتي توصليها من خلال كتابك؟

-في "عوالم نابليون"، الرسالة كانت إن خلودنا بيكون من خلال الخير اللي بنقدمه في حياتنا. الفكرة إن الأعمال هي اللي بتخلدنا، مش الكنوز ولا النفوذ.

6. إزاي كانت تجربتك مع الكتابة والنشر لحد دلوقتي؟

-ناجحة نوعًا ما، لكن كل ما بوصل لمكان، بتطلع طموحاتي للأفضل.

7. إيه أكتر حاجة بتحبها في التواصل مع القراء؟

آراء القراء في أعمالي، لأنها بتكون دفعة قوية للمضي قدمًا.

8. لو عندك نصيحة لكُتاب بيبدأوا مسيرتهم، هتكون إيه؟

-ما تبدأش غير لما تكون فاهم يعني إيه فن الرواية، وتكون قادر تكتب قصة تشد الناس من البداية للنهاية.

9. إيه خططك أو طموحاتك المستقبلية في الكتابة؟

-بفكر في رواية جديدة، وكمان بفكر في نشر رواية على السوشيال ميديا قريبًا.

10. إيه اللي بيحفزك على الاستمرار في الكتابة وتطوير نفسك؟

-حلمي وهدفي هو اللي بيخليني مستمرة ومكملة.

انتظروا المزيد على مدونة إلينور