لقاء مع الكاتبة/ لانا خالد

لقاء صحفي مع الموهوبة لانا خالد

1. عرفينا بنفسك وبداية مشوارك في الكتابة؟ 

-أنا لانا خالد، عندي 15 سنة، بدأت الكتابة من أربع أو خمس سنين. كنت بكتب في احتفاليات قصص قصيرة، ومن هنا بدأت رحلتي في عالم الكتابة.

2. إيه العمل الأدبي اللي حسيتِ إنه كان له أكبر تأثير في مسيرتك؟

-رواية "الشاحنة الحمراء" هي العمل اللي أنا اللي كتبته، وحاسة إنها عملت تأثير أكبر من أي رواية تانية.

3. إيه الجديد في عملك الأخير "ما وراء الجدران"؟ وكلمينا عن أهم ما يميز الكتاب ده.

- "ما وراء الجدران" عمل من نوع جديد بالنسبالي، أول مرة أكتب عنه بصراحة. التجربة دي تعتبر جديدة بالنسبالي، وأتمنى أنجح فيها.

4. لو في اقتباس واحد يعبر عن فكرة كتابك الأخير، هيكون إيه؟

"كان كالشمس، يبدد الظلام ويمنح الدفء دون انتظار مقابل، أما الآن هو كالليل الموحش، يتسلل بخبث ليطفئ كل نور، تاركًا خلفه عتمة لا تُحتمل."

5. إيه الرسالة أو الهدف اللي حاولتِ توصيله من خلال كتابك؟

الرسالة هي: "بلاش الثقة بنسبة 100% في أي شخص"، وكمان "مفيش كذبة مش بتنكشف حتى لو مر سنين".

6. إزاي كانت تجربتك مع الكتابة والنشر بشكل عام؟

كانت تجربة لذيذة جدًا بصراحة. الكتابة مرهقة لكن لطيفة، وبنقدر نخرج فيها مشاعرنا وأفكارنا.

7. إيه أكتر شيء بتحبيه في تفاعل القراء مع كتاباتك؟

بحب النقد اللي بيبقى بغرض النصيحة، لأنه بيساعدني أطور من نفسي ومن كتاباتي.

8. إيه النصيحة اللي بتشوفيها مفيدة لأي كاتب مبتدئ؟

أهم حاجة هي الاستمرار. الاستمرار هو المفتاح الحقيقي في الكتابة.

9. إيه طموحاتك الأدبية المستقبلية؟

أتمنى أكتب حاجة تفيد الناس، وبالتحديد الشباب والمراهقين، مش مجرد ترفيه فقط.

10. إيه الحاجة اللي بتشجعك وتدفعك للاستمرار في الكتابة؟

الكتابة هي حياتي، وهي السبب الرئيسي اللي بيخليني أستمر وأواصل في هذا المجال.

انتظروا المزيد من لقاءات المبدعين على إلينور