لقاء مع ملك إبراهيم محمد: عن الكتابة، الطموح، والتحديات
لقاء مع ملك إبراهيم محمد: عن الكتابة، الطموح، والتحديات
1. عرفينا بنفسك وببدايتك في الكتابة.
أنا ملك إبراهيم محمد، عندي 18 سنة، بدرس في الفرقة الأولى نظم المعلومات، ومقيمة في مدينة الجيزة. بدايتي مع الكتابة كانت في 2018، لما بدأت أدون أفكاري ومشاعري في دفتر خاص.
2. إيه اللي ألهمك تبدأي تكتبي وتستمري في المجال؟
لما كنت بكتب في الدفتر، أصحابي كانوا بيقروا اللي بكتبه، وكلامهم كان دايمًا بيديني دفعة للاستمرار. كانوا بيشوفوا فيا حاجة مختلفة، وده خلاني أصدق إني ممكن أحقق حاجة كبيرة في المستقبل.
3. إيه أكتر عمل كتبتيه وتحسي إنه قريب لقلبك؟ وليه؟
العمل الأقرب لقلبي هو "لدغة عقرب". قدرت أوصل فيه مشاعر كتير للقارئ، وحاولت أعبر عن مواقف حقيقية بتحصل في الوقت الحالي، فكان ليه مكانة خاصة عندي.
4. كلمينا عن عملك الأخير.. إيه قصته؟ وإيه أكتر حاجة بتحبيها فيه؟
آخر عمل ورقي كتبته هو "لدغة عقرب". مش هقدر أحكي تفاصيله، لكن أكتر حاجة بحبها فيه هي الحبكة القوية اللي اشتغلت عليها علشان أوصل مشاعر معينة للقراء.
5. لو تختاري اقتباس يعبر عن فكرتك ككاتبة، هيكون إيه؟
لو عني، فهقول:
> "أنا الكاتِبُ الذي لا ملجأ لهُ إلا قلمهُ."
أما عن عملي، فهقول:
"خطيتُ ذَلِكَ الطَريق، ولم أعد مِنهُ، ورأيتُ ما لَم يَراهُ بَشَرِيٌّ، تَجَرعتُ الألَم مِرارًا وتَكرارًا، حتىٰ لمْ أعُد أعْلَمُ هَل أصبحتُ أشْعرُ أم لا. أُبتليتُ بِنيرانِ الإنتقام التي قد أصبحت تُحْرقُني مَعَ مرورِ الأيّامِ، ثَأرٌ أصْبَحْتُ لا أرىٰ غَيرهُ...".
6. إيه التحديات اللي واجهتك أثناء الكتابة أو النشر؟
مررت بتحديات كتير، خاصة أثناء كتابة آخر عمل. كنت بمر بفترة صعبة نفسيًا بسبب ضيق الوقت وقلة الدعم، لكن الحمد لله قدرت أكمل. أما بالنسبة للنشر، ما واجهتش مشاكل مع الدار اللي بتعامل معاها.
7. إيه أكتر حاجة بتحسي إنها بتربطك بقرائك؟
طموحي الدائم هو اللي بيربطني بيهم. مهما حاولت أوقف كتابة، دايمًا برجع علشان هدفي أكون معروفة ككاتبة، ويكون اسمي مرتبط بأعمالي الجميلة.
8. إيه النصيحة اللي كنتِ تتمني تسمعيها في بداية مشوارك؟
إن مش كل الناس حواليكي هيتمنوا ليكي الخير. أنا بطبيعتي طيبة وبشوف الناس كلها كويسة، لكن كان نفسي حد ينصحني أكون أكثر حذرًا.
9. لو في مشروع جديد شغالة عليه، ممكن تشاركينا لمحة عنه؟
مش بحب أتكلم عن المشاريع اللي بشتغل عليها علشان تكون مفاجأة، لكن عندي هدف في 2025 إني أكون من ضمن الكُتاب المعروفين جدًا قبل معرض القاهرة 2026.
10. إيه أكتر حاجة بتديك دافع للاستمرار وتطوير نفسك ككاتبة؟
الهدوء والدعم المعنوي من القراء هما أكتر حاجتين بيدوني طاقة للاستمرار.
انتظروا المزيد على إلينور.
تعليقات
إرسال تعليق
يسعدنا مشاركة رأيك